---
title: "Tasiilami nutaanik inissialiortoqalerpoq"
description: "Naqqinneqarpoq: maajip 22-iat 2025"
date: "2025-11-05"
created: "2025-08-07"
---

# Tasiilami nutaanik inissialiortoqalerpoq

[Hjem](https://iserit.gl/)

                    [Iserit A/S-imiit nutaarsiassat kingulliit](https://iserit.gl/iserit-as-imiit-nutaarsiassat-kingulliit)

                [Tasiilami nutaanik inissialiortoqalerpoq](https://iserit.gl/iserit-as-imiit-nutaarsiassat-kingulliit/tasiilami-nutaanik-inissialiortoqalerpoq)

## **Tasiilami nutaanik inissialiortoqalerpoq**

#### **Tasiilami Napparngummumi nutaanik inissialiortoqartussanngorpoq. Maajimi allagartaq sanaartortoqarneranik ilisarnaataasussaq ikkunneqassaaq, taamatuttaarlu juunimi 2025-mi sanaartornissamut nivariaqqaartoqassasoq naatsorsuutaavoq. Sanaartornermi atortussat qajannaatsut attartuullu atorneqarlutillu kvadratmiiterimut akigissaartumik naleqquttumillu sanaartortoqassaaq.**

Tasiilami suliniummi inissiat attartortakkat 14-it uiguleriaannut marlunnut avissimasut sanaartorneqassapput. Inissiat tamarmik marlunnik pingasunillu initaqarlutillu ilaqutariiaqqanut kisimiittunullu meerartalinnut naleqqupput.

*– Nutaanik sanaarortussanngoraangatta nuannertuaannarpoq. Nalunngilarput inissianik pisariaqartitsisoqartoq – taamaammat suliniutip qanimut malinnaaviginissaa qilanaaraarput,* Sara Asmussen, Iserit A/S-imi Suliniutinut Pisortaq oqarpoq.

**Immikkut qulaajaaneq**

Suliniut Kommuneqarfik Sermersooq qanimut suleqatigalugu ineriartortinneqarpoq. Iserit A/S-imi Teknikkeqarnermut Pisortaq, Henrik Strand, malillugu Tasiilami sanaartortoqassatillugu siumungaaq pilersaarusiorluaqqissaarnissaq pingaaruteqarpoq, tassami assartuinerit aserfallatsaaliuinerillu immikkut ittumik qulaajarneqaqqissaartariaqarput;

*– Ataatsimoorluta avatangiisinut tulluartunik ersarissunillu qalipaatilinnik, taamatuttaarlu Tunumi pissutsinut tulluartunik inissialiornissatsinnik siunnerfeqaqatigiinnerput isumaqaqaaq. Taamaammat sanaartugassanut atortunik attartullutillu kvadratmiiterimut akimikkut naleqquttunik toqqaanissarput, taamaalillutalu inissianik qajannaatsunik piujuartitsinermillu tunngaveqarluta aningaasatigut ingerlassinnaasatsinnik qulakkeerinninnissarput anguniarsimavarput,* Henrik oqarpoq.

Sanaartorneq Iserit A/S-ip Tunumi illoqarfiit annersaanni ilaqutariit amerlanerusut ullutsinnut naleqquttunik pitsaasunillu inissaqartinnissaannik suliniuteqarneranut ilaalluinnarpoq.

**Tasiilami sanaartornissaq pillugu paasissutissat:**

- Juunimi 2025-mi sanaartortoqalernissaa naatsorsuutigineqarpoq
- Inissianik 14-nik uiguleriiaannut marlunnut avissimasunik sanaartortoqassaaq
- Kommunip inissiat saqqai tungujortut, qaqortunik igalasserfeqarlutillu matullit akueraat
- Quit immikkut aappalaartunik, qorsunnik, qaqortunik sungaartunillu qalipaateqassapput
- Sanaartugassanut atortussat najukkami pissarsiareqqinneqarsinnaanngimmata isumatusaartumik toqqarneqarput

        ![](https://iserit.gl/i/MOLIRIMEDIA/4b4e7ecc-99a6-4448-4337-08ddd313db30?width=800)